ಹೊಸದಾಗಿ ಕಲಿಕಾ ಕೇಂದ್ರ ಪ್ರಾರಂಭಿಸಲು ಇಚ್ಛಿಸುವ ರಾಜ್ಯದಲ್ಲಿನ ಸಂಘಸಂಸ್ಥೆಗಳು ಜೆಎಸ್‍ಎಸ್ ಕರ್ನಾಟಕ ಮುಕ್ತ ವಿದ್ಯಾಲಯದ ನಿಗದಿತ ಅರ್ಜಿ ನಮೂನೆಯಲ್ಲಿ ಮಾಹಿತಿ ವಿವರ ಭರ್ತಿ ಮಾಡಿ, ದೃಢೀಕೃತ ಅಗತ್ಯ ದಾಖಲೆ ಪತ್ರಗಳನ್ನು ಲಗತ್ತಿಸಿ, ಚೆಕ್ ಲಿಸ್ಟ್ ನೊಂದಿಗೆ ಮುಕ್ತ ವಿದ್ಯಾಲಯ ಕೇಂದ್ರ ಕಛೇರಿಗೆ ಸಲ್ಲಿಸಬೇಕು.

2024-25ನೇ ಸಾಲಿನಿಂದ ಆನ್‍ಲೈನ್ ಮೂಲಕವೇ ಹೊಸ ಕಲಿಕಾ ಕೇಂದ್ರ ತೆರೆಯಲು ಅರ್ಜಿಗಳನ್ನು ಸಲ್ಲಿಸಲು ಅವಕಾಶ ಕಲ್ಪಿಸಲಾಗಿದೆ. ಆಸಕ್ತ ಸಂಘಸಂಸ್ಥೆಗಳಿಂದ ಕೋರಿಕೆ ಬಂದಲ್ಲಿ, ಪ್ರಸ್ತಾವನೆ ನಮೂನೆಯನ್ನು ಕೇಂದ್ರ ಕಛೇರಿಯಿಂದ ಅವರ ವಿಳಾಸಕ್ಕೆ ಕಳುಹಿಸಿಕೊಡಲಾಗುವುದು.

ಕೇಂದ್ರ ಕಛೇರಿಗೆ ಸಂಘಸಂಸ್ಥೆಗಳು ಪ್ರಸ್ತಾವನೆ ಸಲ್ಲಿಸಿದ 15 ದಿನಗಳ ಅವಧಿಯೊಳಗೆ ಅವುಗಳನ್ನು ಪರಿಶೀಲಿಸಿ, ಹೊಸ ಕಲಿಕಾ ಕೇಂದ್ರ ತೆರೆಯುವ ಸಂಸ್ಥೆಗಳ ಭೌತಿಕಸ್ಥಳ ಪರಿಶೀಲನೆ ಅಥವಾ ಆನ್‍ಲೈನ್ ಮೂಲಕ ಸ್ಥಳ ವೀಕ್ಷಣೆ ಹಾಗೂ ಮೂಲಭೂತ ಸೌಲಭ್ಯ ಮತ್ತು ಶೈಕ್ಷಣಿಕ ಕಲಿಕೆಗೆ ಪೂರಕವಾದ ಪರಿಸರವನ್ನು ಹೊಂದಿರುವ ಬಗ್ಗೆ ಖಾತರಿಪಡಿಸಿಕೊಂಡು ಅರ್ಹವಾದ ಟ್ರಸ್ಟ್/ಶಿಕ್ಷಣ ಸಂಸ್ಥೆಗಳಿಗೆ ಷರತ್ತುಗಳನ್ನೊಳಗೊಂಡ ಅಫಿಡೆವಿಟ್ ಇತ್ಯಾದಿ ಸಂಬಂಧಪಟ್ಟ ದಾಖಲೆಗಳನ್ನು ಪಡೆದುಕೊಂಡು, ಸದರಿ ಸಂಸ್ಥೆಗಳಿಂದ ಮಾನ್ಯತೆ ನಿಗಧಿತ ಶುಲ್ಕ ಪಡೆದು, ಎರಡು ವರ್ಷಗಳ ಅವಧಿಯವರೆಗೆ ಹೊಸ ಕಲಿಕಾಕೇಂದ್ರ ತೆರೆಯಲು ಮಾನ್ಯತೆ ಆದೇಶ ನೀಡಲಾಗುತ್ತದೆ. ಮಾನ್ಯತೆ ಆದೇಶ ಪಡೆದ ನಂತರವೇ ಕಲಿಕಾಕೇಂದ್ರಗಳು ದಾಖಲಾತಿ ಪ್ರವೇಶಪ್ರಕ್ರಿಯೆಯನ್ನು ಆರಂಭಿಸಬೇಕು ಹಾಗೂ ಪ್ರಚಾರಕಾರ್ಯ ಕೈಗೊಳ್ಳಬೇಕು.

• ಸರ್ಕಾರಿ ಶಾಲೆಗಳು/ಖಾಸಗಿ ಶಿಕ್ಷಣ ಸಂಸ್ಥೆಗಳು (ಅನುದಾನಿತ/ಅನುದಾನ ರಹಿತ)
• ಸರ್ಕಾರದ ಮಾನ್ಯತೆ ಪಡೆದ ಶೈಕ್ಷಣಿಕ ಚಟುವಟಿಕೆಗಳ ಉದ್ದೇಶ ಹೊಂದಿರುವ ಖಾಸಗಿ ಸಂಘಸಂಸ್ಥೆ/ಟ್ರಸ್ಟ್ ಗಳು (ತಮ್ಮ ಬೈಲಾದಲ್ಲಿ ಶೈಕ್ಷಣಿಕ ಚಟುವಟಿಕೆ ನಡೆಸಲು ಅವಕಾಶ ಕಲ್ಪಿಸಿರಬೇಕು, ಕಲಿಕಾಕೇಂದ್ರದ ಚಟುವಟಿಕೆಗಳನ್ನು ನಡೆಸಲು/ಸಂಪರ್ಕ ತರಗತಿಗಳನ್ನು ನಡೆಸಲು ಕೊಠಡಿ ಮತ್ತು ಮೂಲಭೂತ ಸೌಲಭ್ಯಗಳನ್ನು ಹೊಂದಿರಬೇಕು.)

• ಟ್ರಸ್ಟ್ ಹಾಗೂ ಆಡಳಿತ ಮಂಡಳಿ ವಿವರ ಮತ್ತು ಬೈಲಾ ಪ್ರತಿ (ಪ್ರಾರಂಭಿಸಿ ಕನಿಷ್ಠ ಮೂರು ವರ್ಷ ಆಗಿರಬೇಕು)
• ಶಾಲೆ ಅಥವಾ ಕಾಲೇಜು ತೆರೆಯಲು ಸರ್ಕಾರ ನೀಡಿರುವ ಅನುಮತಿ ಆದೇಶ ಪ್ರತಿ (ಅವಶ್ಯಕತೆ ಇದ್ದಲ್ಲಿ)
• ಸಂಸ್ಥೆಯಲ್ಲಿರುವ ಮೂಲಭೂತ ಸೌಲಭ್ಯಗಳ ವಿವರ ಮತ್ತು ಛಾಯಾಚಿತ್ರ
• ವಿಷಯವಾರು ಶಿಕ್ಷಕರ ವಿದ್ಯಾರ್ಹತೆ ಹಾಗೂ ಸೇವಾ ಅವಧಿ ವಿವರ
• ಗ್ರಂಥಾಲಯ ಮತ್ತು ಪ್ರಯೋಗಾಲಯ ಮಾಹಿತಿ ವಿವರ
• ಅಫಿಡೆವಿಟ್ / ಪ್ರಮಾಣಪತ್ರ (20/- ರೂ. ಛಾಪಾ ಕಾಗದದಲ್ಲಿ)
• ಆಡಳಿತ ಮಂಡಳಿಯ ಈ ಕೆಳಕಂಡ ಎರಡು ಠರಾವು ಪ್ರತಿಗಳು
  1) ಕಲಿಕಾ ಕೇಂದ್ರ ತೆರೆಯುವ ಬಗ್ಗೆ
  2) ಸಮನ್ವಯಾಧಿಕಾರಿಗಳ ನೇಮಕಾತಿ ಬಗ್ಗೆ
• ಸಮನ್ವಯಾಧಿಕಾರಿಗಳ ಪರಿಚಯ ಪತ್ರ
• ಕನಿಷ್ಠ ಮೂರು ವರ್ಷಗಳ ಆಡಿಟ್ ಪ್ರತಿ.

ಪ್ರಸ್ತಾವನೆ ಸಲ್ಲಿಸಿದ ಅರ್ಹ ಸಂಸ್ಥೆಗಳಿಗೆ ಪ್ರಸ್ತಾವನೆಯನ್ನು 15 ದಿವಸಗಳೊಳಗಾಗಿ ಪರಿಶೀಲಿಸಿ, ಭೌತಿಕ ಸ್ಥಳ ಪರಿಶೀಲನೆ ಮಾಡಿ, ಅರ್ಹ ಸಂಸ್ಥೆಗಳಿಗೆ ಹೊಸ ಕಲಿಕಾ ಕೇಂದ್ರ ತೆರೆಯಲು ಎರಡು ವರ್ಷಗಳ ಅವಧಿಯವರೆಗೆ ನಿಗದಿತ ಶುಲ್ಕ ಪಡೆದು ಮಾನ್ಯತೆ ಆದೇಶ ನೀಡಲಾಗುತ್ತದೆ.

ತೃಪ್ತಿಕರವಾಗಿ ಕಾರ್ಯನಿರ್ವಹಿಸುತ್ತಿರುವ ಕಲಿಕಾಕೇಂದ್ರಗಳಿಗೆ ಕಲಿಕಾಕೇಂದ್ರಗಳ ಮನವಿ ಮೇರೆಗೆ ನಿಗದಿತ ಶುಲ್ಕ ಪಡೆದು ಮುಂದಿನ ಎರಡು ವರ್ಷದ ಅವಧಿಗೆ ಮಾನ್ಯತೆ ನವೀಕರಣವನ್ನು ಮುಕ್ತ ವಿದ್ಯಾಲಯದ ಕೇಂದ್ರ ಕಛೇರಿಯಿಂದ ನೀಡಲಾಗುವುದು

ಮುಕ್ತ ವಿದ್ಯಾಲಯ ಕಾಲಕಾಲಕ್ಕೆ ಹೊರಡಿಸುವ ಅಧಿಸೂಚನೆ, ಸುತ್ತೋಲೆ, ಜ್ಞಾಪನಾಪತ್ರ ಹಾಗೂ ಮಾರ್ಗಸೂಚಿಗಳನ್ನು ತಪ್ಪದೆ ಕಲಿಕಾ ಕೇಂದ್ರಗಳು ಕಡ್ಡಾಯವಾಗಿ ಪಾಲಿಸಬೇಕು.

1. ಹೊಸ ಕಲಿಕಾಕೇಂದ್ರ ಮಾನ್ಯತೆ ಶುಲ್ಕ - ರೂ. 5000/- (ಪ್ರಾರಂಭದಲ್ಲಿ ಒಮ್ಮೆ ಮಾತ್ರ)

2. ಮಾನ್ಯತೆ ನವೀಕರಣ ಶುಲ್ಕ - ರೂ. 1000/- (ಪ್ರತಿ ಎರಡು ವರ್ಷಕ್ಕೊಮ್ಮೆ)

ಹೊಸ ಕಲಿಕಾ ಕೇಂದ್ರಗಳು ತಮ್ಮ ಕಲಿಕಾಕೇಂದ್ರಕ್ಕೆ ಪ್ರತ್ಯೇಕ ಸಂಕೇತ ಸಂಖ್ಯೆಯನ್ನು ಪರೀಕ್ಷಾ ಮಂಡಳಿಯಿಂದ ಪಡೆಯಲು, ಪರೀಕ್ಷಾ ಮಂಡಳಿ ನಿಗಧಿಪಡಿಸಿರುವ ನಿಗದಿತ ಬ್ಯಾಂಕ್ ಚಲನ್‍ನಲ್ಲಿ ರೂ. 10,000/- ಗಳನ್ನು ತುಂಬಿ, (ಪ್ರಾರಂಭದಲ್ಲಿ ಒಮ್ಮೆ ಮಾತ್ರ) ಬ್ಯಾಂಕ್ ಮೂಲಕ ಪರೀಕ್ಷಾ ಮಂಡಳಿ ಖಾತೆಗೆ ಜಮಾ ಮಾಡಿ, ನಂತರ ಮುಕ್ತ ವಿದ್ಯಾಲಯ ಕೇಂದ್ರಕಛೇರಿ ಮೂಲಕ ಪರೀಕ್ಷಾ ಮಂಡಳಿಗೆ ಮನವಿ ಸಲ್ಲಿಸಬೇಕು. ತದನಂತರ ಪರೀಕ್ಷಾ ಮಂಡಳಿ ನಿಯಮಾನುಸಾರ ಕಲಿಕಾಕೇಂದ್ರ ಸಂಕೇತ ಸಂಖ್ಯೆ ನೀಡಲು ಪ್ರಕ್ರಿಯೆ ಆರಂಭಿಸುತ್ತದೆ. ಕಲಿಕಾಕೇಂದ್ರಗಳು ಪಡೆಯುವ ಸಂಕೇತ ಸಂಖ್ಯೆಯ ಮೂಲಕವೇ ಪರೀಕ್ಷಾ ಅರ್ಜಿ ಸಲ್ಲಿಕೆ, ಪ್ರವೇಶ ಪತ್ರ ಪಡೆಯುವಿಕೆ, ಫಲಿತಾಂಶ ಮತ್ತಿತರ ಮಾಹಿತಿಗಳನ್ನು ಆನ್‍ಲೈನ್ ಮೂಲಕ ಪಡೆಯಲು ಪರೀಕ್ಷಾ ಮಂಡಳಿ ಅವಕಾಶ ಕಲ್ಪಿಸಿದೆ.

ಕರ್ನಾಟಕ ಮುಕ್ತ ವಿದ್ಯಾಲಯ ಪ್ರಾರಂಭದ ಸರ್ಕಾರಿ ಆದೇಶ

ಕರ್ನಾಟಕ ರಾಜ್ಯದಲ್ಲಿ ಶಾಲೆ ಬಿಟ್ಟ ಮಕ್ಕಳನ್ನು ಶಿಕ್ಷಣದ ಪ್ರಮುಖವಾಹಿನಿಯಲ್ಲಿ ತೊಡಗಿಸಲು ಕರ್ನಾಟಕ ಮುಕ್ತ ವಿದ್ಯಾಲಯ ಎಂಬ ಹೆಸರಿನಲ್ಲಿ ಮುಕ್ತ ವಿದ್ಯಾಲಯವನ್ನು ತೆರೆಯಲು ಜಗದ್ಗುರು ಶ್ರೀ ಶಿವರಾತ್ರೀಶ್ವರ ಮಹಾವಿದ್ಯಾಪೀಠ (JSS MVP) ಇವರಿಗೆ ನವೆಂಬರ್ 1999ರ ಅಂತ್ಯದವರೆಗೆ ನಡೆಸಲು ಕರ್ನಾಟಕ ಸರ್ಕಾರವು ಅನುಮತಿ ನೀಡಿದೆ.

ಕರ್ನಾಟಕ ಸರ್ಕಾರದ ಆದೇಶ ಸಂಖ್ಯೆ : ಇಡಿ 52, ಎಸ್‍ಇಎಸ್ 98, ಬೆಂಗಳೂರು, ದಿನಾಂಕ 15.05.1999

ಶಾಶ್ವತ ಆದೇಶ

ಕರ್ನಾಟಕ ಸರ್ಕಾರವು ಕರ್ನಾಟಕ ರಾಜ್ಯದಲ್ಲಿ ಶಾಲೆ ಬಿಟ್ಟ ಮಕ್ಕಳನ್ನು ಶಿಕ್ಷಣದ ಪ್ರಮುಖವಾಹಿನಿಯಲ್ಲಿ ತೊಡಗಿಸಲು ಕರ್ನಾಟಕ ಮುಕ್ತ ವಿದ್ಯಾಲಯ ಎಂಬ ಹೆಸರಿನಲ್ಲಿ ಶ್ರೀ ಜಗದ್ಗುರು ಶಿವರಾತ್ರೀಶ್ವರ ಮಹಾವಿದ್ಯಾಪೀಠ (JSS MVP), ಮೈಸೂರು ಇವರಿಗೆ ಕರ್ನಾಟಕ ಮುಕ್ತ ವಿದ್ಯಾಲಯವನ್ನು ದಿನಾಂಕ 01.06.2002 ರಿಂದ ಜಾರಿಗೆ ಬರುವಂತೆ ಹಾಗೂ ಸರ್ಕಾರದ ಮುಂದಿನ ಆದೇಶದವರೆಗೆ ಕರ್ನಾಟಕ ಮುಕ್ತ ವಿದ್ಯಾಲಯ ನಡೆಸಲು ತಾತ್ವಿಕವಾಗಿ ಅನುಮತಿ ನೀಡಿ ಆದೇಶಿಸಿದೆ.

ಕರ್ನಾಟಕ ಸರ್ಕಾರದ ಆದೇಶ ಸಂಖ್ಯೆ : ಇಡಿ 52, ಎಸ್‍ಇಎಸ್ 98, ಬೆಂಗಳೂರು, ದಿನಾಂಕ 22.12.2001

ತತ್ಸಮಾನ ಆದೇಶ

ಜೆಎಸ್‍ಎಸ್ ಕರ್ನಾಟಕ ಮುಕ್ತ ವಿದ್ಯಾಲಯದ 10ನೇ ತರಗತಿ ವಿದ್ಯಾರ್ಥಿಗಳಿಗೆ ಕರ್ನಾಟಕ ಪ್ರೌಢ ಶಿಕ್ಷಣ ಪರೀಕ್ಷಾ ಮಂಡಳಿ ನಡೆಸುವ ಪರೀಕ್ಷೆಯನ್ನು ಎಸ್‍ಎಸ್‍ಎಲ್‍ಸಿ ಪರೀಕ್ಷೆಗೆ ಸಮಾನ/ತತ್ಸಮಾನವೆಂದು ಕರ್ನಾಟಕ ಸರ್ಕಾರ ಆದೇಶಿಸಿದೆ.

ಕರ್ನಾಟಕ ಸರ್ಕಾರದ ಆದೇಶ ಸಂಖ್ಯೆ : ಇಡಿ 73 ಎಸ್‍ಎಲ್‍ಬಿ 2006, ಬೆಂಗಳೂರು, ದಿನಾಂಕ 06.09.2006

ಪದವಿಪೂರ್ವ (12ನೇ ತರಗತಿ) ದಾಖಲಾತಿ ಆದೇಶ

ಈ ಕೆಳಕಂಡ ಆದೇಶಗಳ ಅನ್ವಯ ಕರ್ನಾಟಕ ಮುಕ್ತ ವಿದ್ಯಾಲಯದ ಮೂಲಕ ಪ್ರವೇಶ ಪಡೆದು 10ನೇ ತರಗತಿಯಲ್ಲಿ ಉತ್ತೀರ್ಣರಾದ ವಿದ್ಯಾರ್ಥಿಗಳು ಪಡೆದ ಅಂಕಪಟ್ಟಿ ಆಧಾರದ ಮೇಲೆ ಪದವಿಪೂರ್ವ ತರಗತಿಗೆ ದಾಖಲಾಗಲು ಅವಕಾಶವಿದೆ.

ಎ) ಕರ್ನಾಟಕದ ಸಾರ್ವಜನಿಕ ಶಿಕ್ಷಣ ಇಲಾಖೆ ಆಯುಕ್ತರ ಕಛೇರಿ ಆದೇಶ ಸಂಖ್ಯೆ ಸಿ4(3) ಇತರೆ.54/2002-03 ದಿನಾಂಕ. 11.02.2003

ಬಿ) ಪದವಿಪೂರ್ವ ಶಿಕ್ಷಣ ಇಲಾಖೆ, ನಿರ್ದೇಶಕರ ಕಛೇರಿ ಆದೇಶ ಸಂಖ್ಯೆ ಪಪೂಶಿಇ/ಶೈಶಾ/ಕ.ಮು.ವಿ./2021-22 ದಿನಾಂಕ 07.04.2022

ನೌಕರಿ ಅರ್ಹತಾ ಆದೇಶ

2006ನೇ ಸಾಲಿನ ಹಾಗೂ ಹಿಂದಿನ ಸಾಲುಗಳಲ್ಲಿ ಕರ್ನಾಟಕ ಪ್ರೌಢ ಶಿಕ್ಷಣ ಪರೀಕ್ಷಾ ಮಂಡಳಿಯಿಂದ ಹತ್ತನೇ ತರಗತಿಯಲ್ಲಿ ಉತ್ತೀರ್ಣರಾದ ವಿದ್ಯಾರ್ಥಿಗಳಿಗೆ ವಿತರಣೆಯಾಗಿರುವ ಕರ್ನಾಟಕ ಮುಕ್ತ ವಿದ್ಯಾಲಯ (ಕೆಓಎಸ್) ಪರೀಕ್ಷೆಯ ಪ್ರಮಾಣಪತ್ರ/ಅಂಕಪಟ್ಟಿಗಳನ್ನು ಎಸ್‍ಎಸ್‍ಎಲ್‍ಸಿಗೆ ತತ್ಸಮಾನವೆಂದು ಕರ್ನಾಟಕ ಸರ್ಕಾರ ಪರಿಗಣಿಸಿ ಆದೇಶಿಸಿದೆ. ಸದರಿ ಮುಕ್ತ ವಿದ್ಯಾಲಯದ ಅಂಕಪಟ್ಟಿಗಳನ್ನು ರಾಜ್ಯ ಸರ್ಕಾರದ ಎಲ್ಲಾ ಇಲಾಖೆಗಳಲ್ಲಿ ಹಾಗೂ ರಾಜ್ಯದ ನಿಗಮ ಮಂಡಳಿಗಳು ಸ್ವಾಯತ್ತ ಸಂಸ್ಥೆಗಳಲ್ಲಿನ ನೇಮಕಾತಿ/ ಉದ್ಯೋಗಕ್ಕೆ ಪರಿಗಣಿಸಲು ಕರ್ನಾಟಕ ಸರ್ಕಾರದಿಂದ ಆದೇಶವಾಗಿದೆ.

ಕರ್ನಾಟಕ ಸರ್ಕಾರದ ಆದೇಶ ಸಂಖ್ಯೆ: ಇಪಿ 72 ಎಸ್‍ಎಲ್‍ಬಿ 2022 ಬೆಂಗಳೂರು, ದಿನಾಂಕ 30ನೇ ಜೂನ್ 2023.

ಸದರಿ ಆದೇಶದ ಮೇರೆಗೆ ಮುಕ್ತ ವಿದ್ಯಾಲಯದಲ್ಲಿ ಶಿಕ್ಷಣ ಪಡೆದ ವಿದ್ಯಾರ್ಥಿಗಳು ಸರ್ಕಾರ/ಖಾಸಗಿ ಸಂಸ್ಥೆಗಳಲ್ಲಿ ಉದ್ಯೋಗ ಪಡೆಯಲು ಅರ್ಹರಾಗಿರುತ್ತಾರೆ.